ಹೇಗೆ ಬಣ್ಣಿಸಲಿ ನಾ ಆ ಜಲಧಾರೆಯ ಪರಿ
ಹೇಗೆ ಚಿತ್ರಿಸಲಿ ನಾ ಆ ಧುಮ್ಮಿಕ್ಕುವ ಝರಿ
ಎಲ್ಲವೂ ಪ್ರಕೃತಿಯ ಅಚ್ಚರಿ//
ಧುಮ್ಮಿಕ್ಕುವ ಜಲಧಾರೆಯ ಕಂಡು ಕಣ್ ಮನ ಮಿಡಿದಿದೆ
ಅಲೆ ಅಲೆಯಾಗಿ ದಡವನ್ನು ಬಡಿವ ಸದ್ದು ಮನವನ್ನು ಕದಡಿದೆ
ಮಂದವಾಗಿ ಬೀಸುವ ತಂಗಾಳಿಯ ಆ ಸ್ಪರ್ಶ ಮೈನವಿರೆಳಿಸಿದೆ
ಇದ ಕಂಡು ಕಣ್ ಗಳ ಹರಿಸಿದ ನನಗೆ
ನಭೋ ಮಂಡಲವೇ ಕಲೆಗಾರನ ಸುಂದರ ಕಲೆಯಂತೆ
ಕಣ್ಣಲಿ ಅಚ್ಚಳಿದಿದೆ
ಒಟ್ಟಿನಲಿ ತನು ಮನ ಆಹ್ಲಾದದಿ ಮಿಂದೆದ್ದಿದೆ
ಮಿಡಿದಿದೆ, ಕದಡಿದೆ, ಮೈಮನ ತಣಿದಿದೆ
ಒಳ ಮನಸನು ಹುಚ್ಚೆಬ್ಬಿಸಿದೆ
ಜೀವರಾಶಿಗೆ ಜಲ ಉಸಿರು
ಜಲವಿದ್ದರೆ ತಾನೇ ಎಲ್ಲಿಯೂ ಹಸಿರು..
ಆದರೆ ನನಗದು ಹಸಿರು, ಉಸಿರು, ಮನದಾಳದ ಕಲ್ಪತರು
ಉನ್ಮಾದದಲಿ ಹೇಳುವುದಾದರೆ
ಕವಿಗೆ ಅದು ಕವಿತೆ, ಕವಿ ಸಾಲುಗಳ ಒರತೆ
ವೇದಾಂತಿಗೆ ಅದು ಚರಿತೆ, ಸಾಮಾನ್ಯಗೆ ಅದು ವಿಸ್ಮಯ
ರಸಿಕಂಗೆ ಅದೇ ಪ್ರಾಣ, ತ್ರಾಣ, ಜಗ ಸ್ವರ್ಗ
ಉತ್ಪ್ರೇಕ್ಷೆ ಆಗದಿದ್ದರೆ ಅದರಲ್ಲೇ ಆತ ಉನ್ಮತ್ತ....
